ASMARA,(insidesomalia.org)- Wararka ka imaanaya magaalada Asmara ee caasumada dalka Eritera ayaa sheegaya in khilaaf xoogani soo kala dhexgalay Isbahaysiga dib u Xoreynta Soomaaliya Garabka Asmara uu fadhigoodu yahay.

Wararkan oo aanu ka helnay ilo lagu kalsoonyahay ayaa sheegaya in Shiikh Xasan Daahir Aweys uusan ahayn Gudoomiyaha ururka sida ay  sheegeen qaar ka mida madaxda ururka is bahaysiga, kuna cad axdiga u dagsan isbahaysiga dib u xoreynta Soomaaliya.

Axdiga Ururkii Asmara ayaa dhigaya sidan: hadii gudoomiyaha uu dhinto, iscasilo,qayaano galo, hawlgab noqdo, iwm lagala noqondoono xilka gudoomiye-nimada,waxaana sii wadaya xilkaas gudoomiye ku xigeenka 1aad ee xisbiga.

Waxaa kale oo wararkani sheegayaan in si buuxda looga xayuubiyay xilka Gudoomiyihii Isbahaysiga Shiikh Shariif Shiikh Axmed xilkaasna uu sii  wadi doono Sakariye Maxamuud Xaaji Cabdi, Sidoo kale Shariif Xasan sh. Aadan xilka laga qaaday xilkaasna uu sii wadi doono Xuseen Faarax Ceydiid, sida ku cad axdiga isbahaysiga dib u xoreynta soomaaliya.

Waxay wararkani intaa ku darayaan in arintani ay murug ku abuurtay qaar ka mida masuuliyiinta Isbahaysiga iyadoo arintani ay keeni karto kala qeybsan hor leh oo ay kala qeybsamaan mar labaad Isbahaysiga dib u xoreynta Soomaaliya, iyada oo ay horey u kala jabeen Ururkaasi Asmara iyagoo u kala jabay labo garab oo kala ah Qeybta Asmara iyo kuwa Jabuuti  oo haatan heshiis la galaya Dawladda  Federaalka KMG ah ee Soomaaliya.